💕الله اكبر
💕الله أكبر
💕الله أكبر
هاهي عشر ذي الحجه أقبلت 🌸
أيام معدودات💝 ، سريعة الذهاب🍂
فهل أعددنا العدة؟!
السلام عليكم ورحمة الله وبركاتة
بعد إنقطاع تجمعنا هالتدوينه الجميلة ويارب تستفيدون منها بكتب فيها خلاصة تجربتي للحج 🌦
الحمدلله حجيت مرتين الاولى عام ١٤٣٠ والحجه الثانية عام ١٤٣٥ الله يتقبل مني ومنكم صالح الاعمال .. فنوعاً ما أحس عندي معلومات قد تفيد البعض بإذن الله ..
أول شي جميل جداً الواحد يقرا عن الحج ويتثقف بأحكامه ليحذر من محذورات الاحرام والحج ويكونوا بكامل إسعدادهم للمناسك الفضيله وإحتساب أجرها ويستغلها أفضل إستغلال ..
فتاوى الحجّ
مختارات من أهمّ الفتاوى للحجّ والعمرة للشّيخ ابن باز وإبن عثيمين رحمهما الله
هنا
طبعاً هالجانب أتمنى كل واحد يبحث فيه بنفسه أكثر ويثقف نفسه أنا بركز على الجانب الاخر وهو الاستعداد الشخصي وأيش ياخذ وأيش ممكن يحتاج .
💕💕الاستعداد المسبق💕💕
💕 دائماً أعتبر الحج مغامره لازم تهيئ نفسك لها ذهنياً وجسدياً ، لذا لابد من ممارسه رياضة المشي قبل الحج بفتره والاكل الصحي الاكل الصحي والمفيد والمغذي والمكملات الغذائية لازم لازم حرام عنايه كل السنه تضيع بتعب كم يوم لازم نحرص على البشره والشعر مع الضروف والجو والحجاب ..
الفواكة مفيدة جدا وتعكس على نشاطك ونفسيتك لاتقولين حج وما ابغى اكل واتقرف ومدري ايش العكس الفواكة جميله جدا تنعشك وتجدد الحياة فيك بتعطيك طاقه جميله وكويسه للمعدة مع التعب وتغير الاكل عليها إحرصوا عليها قبل الحج وخلال الحج وبعد الحج ..
💕 قبل الحج إهتمي بنظافتك العامه أزيلي الشعر الغير مرغوب فيه قلمي اظافرك -سوي حمام زيت لشعرك وسوي صنفره لجسمك رتبي جواجبك بإختصار شكلك إهتمي فيه مو كونك بعبادة يعني عادي تكونين مبهذله لا ابداً مرتبه ونظيفه ومشرقه شي جميل والميك اب وكذا ما احسها ابداً ضروريه الا بالعيد وبعد فك الاحرام لكن قبل وجهك نضيف وحواجبك مرتبه ووبشرتك جميله الحمدلله كافي جداً.
💕اكتبي الادعيه اللي تبغين تدعي فيها أيش تبغين تدعين ربك الكريم فيه إكتبي مرات الواحد ينسى مع التوتر وش يبغى يدعي فكويس انك تكتبينها بملاحظات الجوال أو بنوت معاك اللي يريحك.
🌟عزيزتي الحاجه في أشياء مشتركة يحتاجها الحاج بشكل عام بحاول اعددها وطبعا قد أنسى شي منها :
١- الاغراض الشخصية (فرشة \معجون \ شامبو \ غسول وجة أو صابونة \ مقص اظافر \ شامبو شعر تنظيف عميق (الجو غالبا حار وعرق) احتمال يسبب قشره وريحة \كريم شعر أو بلسم \ مشط أو فرشاة شعر \ بودرة أطفال ضرورييه للاولاد جداً \ مزيل عرق \ شرابات \ مناديل رطبة \ مرطب شفايف \ كريم جسم \ كريم حروق \ واقي شمس \ كريم حساسية \ أعواد أذان وقطن ومناقيش \ فازلين وفكس\ لصقات للجروح \ فوط صحيية إستخدام يومي\ كلوتات قطنيه إستخدام مره وحدة\ مجفف شعر أو إستشوار ) قسميها بشنط المخصصه مثال الاشياء اللي تستخدمينها كل يوم فرشه ومعجون ومزيل وغسول بشنطه وإذا إحتجتيها طلعي الشنطه وروحي لدوره المياه أفضل من التردد ومن إنك تجيبين كل عفشك ..أغراض الاستحمام مع بعض وهكذا.. زي كذا
وفي عند دايسو علب تعبئه كويسه لشامبو والبلسم بدال ما تاخذين علبه كبيره وتزاحمك
٢- الملابس -إعتمدي ملابس مريحة ومتعودة عليها سواء بجايم ليقنز قمصان اللي متعوده عليه بس أهم شي لا يكون طويل يبهذلك ولا واسع بعد يهذل .. أنصح دايم الواحد ياخذ ملابس متعود عليها مو جديده وتطلع فيها مشاكل ويتوهق ، طبعا مو شي مهتري لا شي جيد ونظيف ومرتب وعملي ومناسب للاجواء ..
-لبس العيد ولبس لنوم وجاكيت أو كنزه أو بلوفر شتوي او ربيعي أوحاجة اكمامها طويلة . مرات تمطر بمكه ويبرد الجو .
- الملابس الداخلية كل يوم غيار أو غيارين . حلو لو تحطين لبس كل يوم بكيس اريح لك لما بتروحي تتروشي وبنفس الكيس تحطي لبسك الوسخ وبعد أرتب واسهل لما تدوري لبس أفضل من تنفشين الشنطه كل مابغيتي شي
٣- المنشفة يا تاخذ أكثر من وحدة بحيث تبدل بينهم أو المناشف الاستخدام الواحد أنظف (لاني اكره آخلي اغراضي مكشوفه عند الناس واحس المنشفه تحتاج تتهوا ولا تخنز )
٤-أدوية ( بنادول- فيتامين سي- حبوب الثوم إذا متعودين على نظام معين بالاكل (لتسمم وكذا)\ ادويه للمعدة إذا عندك تحسس من قبل أو للقيلون ) ومكملات غذائية (حسب الطبيب أنا كنت اخذ للبشره عشان الارهاق ) بس تراها ماتغني عن الاكل لازم اكل قبلها مو ع معدة فاضيه.
٥- الجزم وانتم بكرامه يفضل بدون ربط وليت ثنتين وشبشب للمخيم ..
٦-عبايتين أو ثلاث مع كامل ملحقاتهم (طرح ونقابات).
٧- بطاريه متنقلة لشحن الجوال والواي فاي ..سماعات .. بطاقات شحن ١٠- ١٠ (مو وحده ومبلغها كبير إذا ضاعت في غيرها) ، فيش ثلاثي .
٨- فلوس كاش وليت صرف صغير ريالات وخمسات وعشرات و وزعيها بكل شنطك إحتياط.
٩-الشنطه اللي بتاخذينها معاك تأكدي إنها مريحة وتكفي جوالك وبطاريتك ومناديل وغيرها .. وسيرها ليت جلد أو شي عريض مو سخيف يعور .. تكون سحاب مو مفتوحه أكثر أمان ..ماتكون كبيره بحيث تتعبك بثقلها ولا صغيره ماتكفي حاجاتك .
ولو تاخذ علبة مويه كويس المويه شي ضروري نقلها معاك ..وسناك . ليه سناك؟ لازم تاخذين معاك بسكويت آنصح ببسكويت مالح لانه يخفف الغيثان مع الارتاج والمسافات الطويله بالسياره ..زياده مرات الباصات تكون بزحمه وتوقف ساعتين بدون اي حركه وأنتي يابعدي جوعانه؟ أفتحي شطتك وكلي بالعافيه انا كنت اخذ كرتون كامل بالشنطه الكبيره وكم حبه بالشنطه اللي معاي دايم الاحتياط واجب ..
١٠- افضل حل لشعر هو الجديله مريحة جداً وحطي بكله بالبدايه والنهاية عشان ما تنفتح ..والتوربان أو البندانه كويسين لداخل المخيم يرتبون الشكل . زي هالصور
١١- الميك أب براحتك لكن افضل الخفيف الاساسي والعطر كذلك لا المكان ولا المناسبه يناسبون الاوفر ابدا. أو إستبدلي العطر بمسك أو خمرية أنعم وأخف .
١٢- أكياس للجزم وأكياس لاحجار الجمرات وأكياس للملابس الوسخه .
هذا اللي ببالي حالياً إذا تذكرت شي برجع أزيده بإذن الله
تذكري أن الحج كم يوم لايضيع وقتك بسوالف أو ضحك أو ع الجوال إستغلي هالكم يوم بالذكر والدعاء وتذكري لا تحقرين من المعروف شي أي احد يحتاج مساعده لو تافهه ساعدي وإحتسبي الاجر لو إنك تمسكين لها باب دورة المياة لو تهفين عليها بالمروحه لو قطره مويه وتذكري إن المسلمين الاجانب يحسون بالغربه فلو صدر منهم شي أزعجك لا تزاعقين ابدا فهميهم أنتي صاحبه البلد والصوره حقته والله يتقبل منك يا حجة
ليست هناك تعليقات:
إرسال تعليق