السلام عليكم ورحمة الله وبركاتة.
مع الشتاء الواحد مو قادر يتحرك ولا حتى يفكر بتدوينه -الافكار موجودة لكن التطبيق بي له جهد ودفا ،لي إسبوع تعبانه ولأول مره أزعل من الشتاء واتمنى رمل وشمس حارة "الفكرة تجيب الدفا بروحها"
مع البرد والتعب مو قادره أسوي خطة مذاكره جديدة فراح أطرح لكم تدوينه عن طريقتي الشبه دائمة(الخطه ب للمذاكره) راح تفيدكم هذي الطريقه بعد التوكل على الله والاستعانه به وبذل الاسباب والجهد والدعاء والتوفيق من الله سبحانه وتعالى ، احرصوا على الدعاء بالتوفيق ولاتنسون أورادكم اليوميه والادعيه وإدعوا لانفسكم بكل صلاه ولاتنسون إخوانكم المسلمين من دعائكم .
هي بإيجاز:
نذاكر بشكل مكثف ولكن بوقت قصير .
بالتفصيل :
هذي الطريقه تحتاج شخص فاهم قدراته ويستغلها ويطورها -زي اللي يمشي كل يوم يحاول يوصل رقم أعلى هنا أعتبره تمرين عقلي وكل يوم نحاول ننجز الهدف وأكثر.
بالبدايه تحتاج تعرف حاجات وتحددها:
١- أنت كآئن صباحي أو مسائي (الوقت المناسب للمذاكره هو وقتك المفضل)
٢- تحفظ أو تفهم (ركز على طرق تناسب قدرتك وتطورها أكثر مع الممارسه)
٣-سمعي أو بصري أو حسي (معرفه نوعك راح يسهل عليك الاستذكار في وقت الحاجه)
٤- تحب المذاكره مكثفه لوقت قصر أو خفيفه لكن بوقت طويل (هذا الشي مهم عشان تستوعب بشكل كامل بدون ملل أو رغبه بالانتهاء)
٥-تقدر كميه إستعابك اليوميه -كم تقدر تقرا صفحه بتركيز كامل؟ (الحد الادنى هو عدد ورقاتك اليوميه وكل يوم حاول تزيد وتطور من إمكانياتك وقدراتك)
وهنا راح أعلمكم أجوبتي وبعدها راح أسرد الطريقه اللي أتبعها بالمذاكره:
١-صباحي
٢-أفهم
٣-سمعي
٤-مكثفه لوقت قصير
فا الطريقه هي :
أذاكر في أول الصباح من ٧ تقريبا والبيت هدوء مع كوب زنجبيل أقرا المسأله وأحاول أفهمها وأعلي صوتي بالشرح وأغير النبره ومعاي قلم محدد وأحدد على الجمل االتعليليه -مثال-" ونصوم لان الله أمرنا بذالك " لان أحدد عليها دائره لانها بدايه السبب وهنا راح يفيد بالمراجعه لاني محدده على كل الاسباب والعلل وفي هذا تسهيل بالتذكر .
تغيير النبره والتعليق بصوت عالي يفيد الشخص السمعي لانه يتذكر الاصوات أكثر من شكل الورقه -هنا اعملوا مسرحيات وأضحكوا فيها حولو المذاكره لشي ممتع عشان تطردون الملل-
إخترت وقتي المفضل لان تركيزي مايطول وأطفش بسرعه وهذا شي مهم في اشخاص عادي يذاكرون بأي مكان وهنا شي مهم نعرفه عشان مانضيع وقتنا بدون مانستفيد منه .
أفضل أجلس وقت قليل لكن مكثف لانه راح أضمن حبل أفكاري ماينقطع أو أنشغل بشي ولا أرجع أذاكر.
فخلال اسبوع اكتب خطه كامله لسبع ايام متى أبدا وكم باب أو فصل أخلص واحدد الجزئيه المطلوبه ، وآلتزم فيها قدر الامكان وان صار لي ظرف أعوض التأخير بكرا . وإذا أنجزت أكافئ نفسي بفيلم من دزني عشان أكسير السعادة ينسيني ضغوط الاختبارات .
طبعاً هذا شي يفيدني انا لكن مو بالضروره يفيدكم لاننا اكيد نختلف بقدراتنا وانا عرضت عليكم هذي الخطه عشان تفكرون بطريقتكم المناسبه للمذاكره بوقت ضيق ولا يتأثر معدلكم ومستواكم فيها .
الجزء الثاني من الخطة (ب)
١-كيف أبدا أذاكر:
هنا عاد راح يناسب الاغلب بحط مثال أسهل بالفهم.
عندي إختبار نحو في كتاب صفحاته ١٢٠ إختبرت في ٤٠ صفحه الاولى . كيف أذاكره؟ أبدا من صفحه ٤١ لان السابق درسته مؤخراً ومايحتاج أضيع وقتي عليه إذا خلصت الكتاب أرجع لـ٤٠ الصفحه الاولى.
٢-أي مادة أذاكر:
إذا معاك وقت طويل تحتاج تحدد هل أنت تفضل تبدا بالصعب وتنتهي بالسهل أو العكس؟
أنا أفضل ابدا بالمواد السهله واخلصها بسرعه وابدا بالصعب عشان ما اطول فيه ويضيق علي الوقت بدون ما أخلص أكبر كميه كتب.
٣-إختباراتي ورا بعض أيش أسوي؟
سهله..المادة الاولى ذاكريها قبل يومين لكن المادة الثانيه ذاكريها قبل اسبوع وانتي فاضيه بيوم الاختبار أكيد راح ترجعين تعبانه وتروح نومه فكونك مذاكره من قبل شي كويس تحتاجين مراجعه شامله للمنهج أو مذاكره الجزء الصعب ومراجعه الباقي .
اعتقد الاغلب يكره فكرة المذاكره قبل وقت طويل لكن راح أقولكم تجربتي قبل سنه ، طبعا هذي طريقتي من زمان لكن قبل سنه كنت مسويه ذا الطريقه الا مادة ماذاكرتها بتاتاً ، أساسا الدكتوره غيرت الكتاب ولا علمتنا الا يوم بدت الاختبارات .
ليله اول إختبار جتني حساسيه لدرجة صحيت من النوم وانا صيح وبكرا علي اصعب إختبار ونهائي وعليه ٧٠ درجة!! راح الليل وانا بالطوارئ لكن الحمدلله حليت لاني مذاكره من قبل. أما أخر مادة اللي ماذاكرتها اساساً رجعت لي نفس الاعراض ورجعت للمستشفى ويوم أخذت الورقه فيني الصيحه ماخلصت المنهج ابداً شعور مره مرعب ناديت الدكتوره قلت لها مطالبه أجاوب نفس الكتاب أو كيف؟ قالت الله يسعدها لا جاوبي من معلوماتك لكن إشرحي وجة نظرك والحمدلله عدت سليمه.
الخلاصه:
أعتبر المذاكره المسبقه من بذل الاسباب وتعرفون أهميه بذل الاسباب بعد التوكل على الله سبحانه وتعالى، الواحد فينا مايدري هل راح يصحى بكرا بخير وعافيه أو يجيه شي بعيد الشر عنكم وعني .
أخيراً : هذي التدوينه كُتبت لتهرب من وضع خطه للمذاكره فإذا إستفدتوا دعواتكم لي تنفتح نفسي للكتب وابدا فيها ، الله يوفقني وإياكم لما يحب ويرضى.
ليست هناك تعليقات:
إرسال تعليق