السلام عليكم ورحمة الله وبركاتة ..
يوم جميل لكم يارب ..هالفترة دخلت سبات صيفي رمضاني ، صراحة عندي تدوينات كثير أبي أنزلها لكن بالنهار ماعندي وقت يا دوام أو شغل بالمطبخ أو نوم ، إشتقت لأيام تأمل إنعكاس أشعة الشمس ومراقبة الظل والنور .
اليوم وأنا بطريقي للجامعة فكرت .. نورينا ليه ما تاخذين أغراضك معاك للجامعة؟ بس للاسف حتى بالجامعة وقت البريك ماخذته الدكتورة يلا المهم النية مو!! هههههه .
نبدا بسم الله .
الفكرة هي "كيف نورينا تستعد للعيد ومابعده من عزايم" طبعاً مثل ماتعرفون أنا أحب الصبغات أكثر من نفسي شي اساسي بحياتي لكن قدر الله إني أجيب العيد وتتعب فروتي جداً النتيجة البائسه هي -فروتي إحترقت- حاولت أعالج الفروة بالماسكات والزيوت والنتيجة -نزلت الصبغة وبس باقي سحب اللون 💔 متخيلين شعري صار
( جاف - تالف - فروة تعبانه - لون قبيح ) اللون أخوي يسميه أسلاك نحاس🌚😂 الصدق مع الجفاف التشبيه سليم جداً .
فالحل اللي قررته كملت عنايه بالزيوت جوز الهند و الارقان ، والماسكات مثل فاشكول وبانويل وهالانواع ..
بعدها رحت للمشغل وقصيت نصه أيوا نص شعري الصدق للحين متألمه لكن خلاص مقرف الفروه تألم والشعر يتساقط بالهبل وتعبان ويتقصف من الجفاف مقدر أتحمله أكثر من كذا 😅
قصيته تحسن شوي يعني صار افضل من ناحيه الجفاف اخف والتقصف راح بس باقي مشكله التساقط لان الفروه مجهده والمشكله الاكبر هي اللون البايخ فطلع عندنا مناسبه وإحتجت أصبغ ورحت صبغت من جديد💀💀💀 أدري جنون 💔
فإحترت كيف أعتني بفروتي ولون شعري بنفس الوقت .. بذات شعري رمادي واللون الرمادي يحتاج يكون لامع وحيوي ولا حيكون كنه شيب😂💔💔
طبيعة فروتي :
فروة راسي دهنية و حساسة بذات اذا صبغت عند مشغل لدرجة أول اسبوع صبغه مقدر أسرح شعري ولا افتحه أحس راح يطيح شعري من الالم ونتيجة للالم هذا يجيني تساقط فضيييع 😭
طبيعة شعري:
شعري دهني ومع الصبغات يكون مايل للجفاف ، مموج مو ناعم سايح ولا كيرلي لا متوسط اللهم لك الحمد لكن بعض الصبغات اللي تكون مجهده له تغير طبيعته فيكون تقريبا مايل للجفاف والنفشه البايخه وباهت يحتاج لمعه وعنايه كثيفه .
المشكله لما اعتني فيه راح يكون كويس بس الفروة تكون دهنيه 😁 والجذور كلها دهون . ف تعبت جدا مو لاقيه حل مناسب غير البلسم لكن البلسم يزيت بشعري كأنه يلغف الشعر وتصير لزجة مهما غيرت طريقة إستخدامي - أستخدم شامبو لشعر المصبوغ وبلسم كذا . معروف مجموعه الشعر المصبوغ تعطي ترطيب أكثر لان المصبوغ غالبا جاف لكن شعري مو جاف لا مايل للجفاف فمع الشامبو والبلسم يدهن ، و بدونهم يكون كنه جاف تعبت جداً.
فالمنتجات اللي أستخدمها حالياً . تقريبا حافظت على اللون ولمعة الشعر وأخفت مظهر الجفاف القبيح . مشكله التساقط ما إختفت مازالت أشوف خصل وخصل لكن بالقريب العاجل بإذن الله راح تنحل . تحتاج الفروة وقت اطول بالعناية .
الشامبو و البلسم البنفسجي من LAKME لاكمي :
الشامبو ما يخلي الشعر جاف زي الباقي ولا تحسون الشعر يتدبق العكس لطيف ومنعش مررره وريحتة كويسه وينظف مو بس يحافظ ع اللون .
البلسم جبار صارحة مدري كيف يلين الشعر تحسونه حيوي بس بدون ما يخلي مظهرة زيتي أو بشع .
إستخدامهم عادي زي أي شامبو لكن أحب أطول فيه شوي حولي 4-3 دقايق لاني أبغى اشيل اي لون برتقالي بالشعر .
البلسم أحطه من تحت الاذن -أبعد عن الجذور وأحط الاطراف ثم بأصابعي أحاول امشط شعري بلطف طبعاً وأترك البلسم حوالي 5 دقايق وأغسليه كويس بالموية .
سعره: واحد 50 والثاني 40 مو ذاكرة بالضبط
من مؤسسة نسائم الجمال بشارع العروبة بالرياض
أنبولات الشعر من ALOE EVA آلو إيفا "ببروتينات الزبادى" لشعر الجاف المجهد :
الامبولات حجمها تقريبا ١٥ مل طريقتها تفتحينها وفيها ماده سايله مو زي الصابون ولا الزيت ولا السيروم كأنها مويه بس خفيفه مررره لماتخلصين متروشه وشعرك مبلول توزعينه على الجذور وتسوين مساج وتخلين شعرك ينشف ماراح تزيت لك الجذور ولا تترك ريحه تختفي ريحتها مع انها مو سيئة أبداً ، الامبوله الواحدة تكفي 3-4 إستخدامات تقريباً . العلبه فيها أربع أمبولات .. تستخدم 3 مرات بالاسبوع لمدة شهرين ..
سعرها:20 ريال
من صيدلية العليا.. في شركات غيرها انا كنت أبغى أمبولات رويال لكن مالقيت وموجود بانتين ولا أحبها فأخذت هذي الشركة أجربها .
سيروم دابر أملا بزيت الحية لشعر المجعد:
الاسم يخوف ههه مدري صراحة يعتبر سيروم أو لا لكنه مو زيتي قوامة نفس السيروم وريحته مقبولة أستخدمة بعد الانبولات أحط قد حبة الحمس براحة يدي وأوزعة على الشعر -من منصف الشعر إلى الاطراف ما أقرب للفروة أبداً ، قوامه خفيف مره كثرت وخفت يطلع زيتي لكن الحمدلله ماطلع زيتي وأحس أحطه وشعري مبلل أفضل من لما ينشف كذا يصير باين الجفاف وتحسون لمعته مو صحيه واضح إنو حاطه شي بالغصب يلمعة😜 لكن لما يكون مبلول أفضل ولا فررررق اللمعة صحيه والشعرة حيويه مره وتحسون مافي نفشه أو شعور انو شعر مرره تعبان لا يعني تعبان تعب مقبول شوي هههههههه😂😂😂😂
سعرة:15 ريال
من صيدلية كنوز .
إنتبهوا من علبته انا بالغلط مالت معاي ولقيت نص السيروم منكب جد ضاق خلقي كل الطاوله سيروم😩
النتيجة مع هالمنتجات :
شعري تحسن بشكل ملحوظ اللهم لك الحمد وهذا شي مريح باقي مشكله التساقط بحاول أعوض شعري بالاكل الصحي والامبولات . أما مشكله اللون اللي ينزل والنفشه والزيوت الزيادة والجفاف الزايد اللهم لك الحمد أعتبرها إنحلت بنسبه 60٪
ماتميت شهر ع ذا الروتين لكن حبيت أنزله لانو في كثير بنات بيصبغون قبل العيد وبإذن الله راح يستفيدون من هالتجربه الاولية ولما أخلصهم راح أرجع آقول التفاصيل مره ثانية بإذن الله .
والحمدلله إنتهيت من هالتدوينه بعد طول غياب يارب تستفيدون وتفيدوني كمان .
شكرا
ردحذف