أهلين / مساء الخير .. كيفكم باخر يوم من الاجازة؟
أنا بدت كوابيس الدوام معاي ولله الحمد 💔
اليوم بكلمكم عن الصبغات بذات المنزليه
أول شي قصتي مع الصبغات قصه طويلة جداً -إذا مو مهتمه عزيزتي تعدي ذا الفقرة ـ
من عرفت نفسي وانا الحنا روتين لي وشعري الحمدلله يمسك اللون لكن لما كبرت طفشت ابي لون غير و
بدايه صبغاتي بالثانوي كانت عبارة عن ـ يسمونها صبغه بالاعشاب-
١- أكسجين ٩
٢-بيضه
٣-فنجال زيت زيتون
٤-ملعقتين نسكافيه - هذا للون تبين أفتح حطي زعفران
-لتنويه ماغيرت شعري ابداً لكن اختي طالع اشقر فااتح كذا تحسي طبيعي مرره
بعدها بديت اصبغ نفسي بصبغات ثابته لكن مو مبينه النتيجة ابداً اخذت لون احمر ومو واضح إلا لمعة تحت الشمس
مذكر ايش اسم الصبغه .
هنا زعلت ليه شعري يمسك لون الحنا ولا يمسك الصبغ؟؟ فررت احد خبير يصبغني
بعدها رحت اصبغ بمشغل اخترت لون كستنائي ماكنت ابي اجازف النتيجة ما اعجبتني ابداً بالبدايه لكن بعد اسبوعين ضبط اللون وطلع حلو وكل اللي ما اعجبهم بالبدايه غيروا رايهم عاد معروف انو بعد اسبوعين يطلع اللون الحقيقي .
بعدها رحت صبغت اشقر زيتي بالمشغل كل الناس يسألون عنه وانا مرره مبسوطه لكن لما شافته امي قالت "وييييييع وش ذا الاخضر ذا اللون وين صرفتي فلوسك *****💔 طبعا انا ضاق خلقي لدرجة حطيت نص علبه زيت زيتون بشعري وتروشت -وهذا اكبر خطاء الزيت يخرب الصبغه وهي لسا ماثبتت بعد تروشت وذا خطاء ثاني-
مثل ماهو موضح الصبغه كرهتها من قلبي لدرجه بس تحملتها شهرين وشريت صبغه وصبغت عليها مع انها كانت جمييله جدا ابيها الحين😟
طبعا صبغت كم لون وكم نوع ثابت ومؤقت ولو حسيت احد متحمس راح اقولكم عنها بالتفصيل الممل
مالكم بالطويله أعلمكم فكرة صبغة البلسم
كميه بلسم قد شعرك+ملعقه صبغه+ملعقه أكسجين . - لطول الشعر لحد اول الكتف وكل ما طال أو كان كثيف تحطي زيادة صبغه و اكسجين بكميات متساوية . تحطيها على شعرك من خمس دقايق لربع ساعه واغسليه وتمتعي باللون الجميل والشعر الصحي اللامع✨ وتحتاج تجديد بشكل شهري لانها بتكون زي المؤقته
كيف عرفت عن طريقه الصبغة؟ رحت اجتماع ووحده كلمتني عنها انو صاحبتها يستخدمون ذا الطريقه لكن يستخدمون صبغه كيدوس رقم ٢٨ معروف النتيجة بتكون زيتي يشق القلب من جماله💋 لكن بشرط يكون الشعر من فتره طوييييله عن الحنا حوالي سنه او اكثر ـ عشان تكون النتيجة زيتي جميل لو قريب شعرك فيه حنا بتطلع بني غامق ولا راح يبين
وورتني صور للبنات مررره جمييل اللون ماشاء الله.
تجربتي:
استخدمت اكسجين ٦٪
والصبغه لاكمي ٥/١٧ -ما اعرف اللون الاساسي بس اعجبني الكرتون واخذته🌚
والبلسم v05 مدري وشو بس عندي بلسمات كثيرات فقررت اضحي به
طبعاً ما تقيدت بالمقاس اللي قلت لكم ولا الصبغه اللي قلتها بالطريقة الااصليه لاني من قريب حطيت حنا وشعري طويل
النتيجه:
يا بنات شي خاارق تخيلو اللون طالع شوكليت واطراف شعري صارت اومبري - لانو بالطبيعه افتح بس مع الصبغه بازر اكثر جلست حوالي اسبوعين والنتيجه رهيبه ثالث اسبوع خفت الاسبوع الرابع اقدر اقول رجع لون الجذور وبهت لونها وتحتاج تجديد .
سؤال أكيد كلكم فكرتوا فيه ليه أصبغ كذا واحوس نفسي واقدر اصبغ بالطريقه العاديه ؟
اعلمك الاسباب:-
١- الصبغ بالبلسم نتيجته مختلفه كل ما قل الوقت كل ما كان اللون اضبط وهذا عكس الصبغه اللي تطولين ع بال ما يطلع اللون اللي تبينه.
٢-لو كنتي من الناس اللي تخاف تتهور او مايعجبها اللون الطريقه ذي تناسبك وبرضوا مناسبه للاشخاص الملولين مايتحملون شهرين بلون واحد.
٣- بالطريقه هذي او بمشغل او البيت بالطريقه التقليديه كلها مع الوقت راح يبهت اللون ويحتاج تجديد بالمشاغل يقولوا تعالي بعد شهر للجذور وشهرين لتجديد الصبغه كامل - يعني احس مافي اختلاف ابدا بالمقارنه بالمضار.
٤- يمكن بعضكم مايعرف ذي الخدعة لكن كنت استخدمها هو لما تسوي صبغة بالبيت تحتاجين تزودينها بلسم عشان تزيد الكمية+ تلين الشعر ويكون حيوي مو جاف تقريبا كنت احط من نص كوب لربع كوب .
٥-اعتبري البلسم تعويض لدمار الامونيا بشعرك .
رأيي:هل ممكن اعيد التجربة؟
اي طبعاً عندي خطط لها بعد واذا نفذتها راح اعلمكم بالتفاصيل .
هل تعبتني الصبغه وسببت لي صداع و دوخه او الم بفروة الرأس؟
ابداً ماحسيت بشي عدا الريحه بعد كانت خفيفه البلسم مخفف الريحه وصاير الصبغ مايحرق الفروة زي باقي الطرق اللي جربتها قبل.
هل حسيت بشعري تعب منها؟
نسبه ١٠٪ احس بالخصل الخفيفه صارت تتشابك لكن ما اعرف هل السبب تغيير الشامبو او الصبغ . بس الحمدلله ما لاحظت جفاف او تقصف اوالشعر منكوش العكس احسه مرره لين ويحمسني اسوي ستريت و ريتو .
حسيتي انو لما طلعت الجذور طلع لونها مختلف وفي ذاك الخط الكريه بين اللونين؟
ابدا الصبغه كنها تنتشر وتختفي ما علمت احو حددت بالشعرة لدرجه لما اشوف ما اعرف ايش الجزء المنصبغ والجزء الجديد.
كم تقيمين نسبة نجاحك بذا التجربه؟وليه؟
٨٠٪ الحمدلله مرره مبسوطه منها ، ليه لانو ما احب اجدد اللون بشكل دايم - عجازة ـ لانو طبيعه شعري ملون فيضايقني كونها تختفي مع انه افضل من يطلع الجذور لون والباقي لون ثاني.
اذا في تفاعل بعلمكم طرق وخلطات بالحنا وانواع الصبغات اللي جربتها ورايي فيها ـ تشويق-
Twitter: norena92
تعليقاتكم تسعدني 💓💓
ليست هناك تعليقات:
إرسال تعليق