أنواع الشعر وطرق العناية به مع نورينا

صباح الخير ..،
اليوم بنتكلم بموضوع مرره أحبه اللي هو العنايه بالشعر بشكل عام ناعم كيرلي ويفي أفريقي .

بالبدايه بتكلم عن الشعر وبعض الحاجات اللي مهم تعرفينها عن شعرك . 
شعرك إنعكاس كامل لتغذيتك شي مهم تاكلين أكلات مفيدة  حرصك على الاكل المفيد بيعطي شعرك حيويه والشعره بتصير ثقيله ويقلل التساقط والتقصف .

وشعرك يحتاج عنايه خارجيه مره مضر إنك عايشه ع الفير أو السراميك شعرك راح يتقطع وينحرق وشي سيئ إنك ما تستخدمين شامبو مناسب .
 أعتقد البنت من الولادة لييين توصل ١٠-١٣ الافضل تستخدم شامبو الاطفال لازم تحافظ على طبيعة شعرها حرام يتدمر وهي طفله فلما تكبر تحاول الام أو الاخت تختار لها شامبو مناسب لنوعيه شعرها -مو الشامبو قطه كل أهل البيت تيستخدمونه بإختلاف أنواع شعورهم- أما اذا نفس النوعيه ما هي مشكله ..

حبي شعرك..،
لازم لما تبي تعتني بشعرك تكوني تحبيه لاتحسونها سخافه بس ماتقدرين تهتمين بشي وأنتي تكرهينه . عامليه بلطف لا تتعبينه بالتسريح لاتتعبينه بالمنتجات اللي ما تناسبه لا تقتلينه بكثر الغسل بالشامبوات المضره والعطريه .

تقبلي شعرك..،
لازم يكون عندك ثقه بأن الله خلقك بأحسن تقويم نوعيه شعرك "ناعم-كيرلي-ويفي-افريقي" أكييد مناسبه لوجهك وملامحك طبعا مو تغسلين شعرك بفيري وتطلعين تجففينه ويصير إسبوع الشجره ثم تقولي والله مايناسبني يخوف شكلي لازم أسوي سراميك ، أكيد حبيبتي لانك أساسا المشكله بعنايتك فيه دماار .


شعر مثالي..،
إذا عندك نيه توصلين لشعر المثالي"مولازم إنه يصير ناعم لا أقصد كيرلي مثالي جميل يلمع لفاته مرتبه وحلوه ، ناعم حلو ، مموج حلو كذا إنك توصلين للمثاليه بنوعية شعرك مو تتغير نوعيه شعرك -هنا لازم تدخل كميائي- اللي تحتاجينه هو العنايه المناسبه لنوعية شعرك"

بيجينا سؤال على أي أساس نصنف الشعر ؟ نوعه العام؟ أو حسب قوام الشعره؟
أقصد بالنوع العام : 
١- دهني
٢- عادي
٣- جاف
٤- مختلط 

قوام الشعره:
١- خفيفه
٢- ثقيله 
٣-متوسطه

طيب ماجبنا طاري إنه كيرلي أو ويفي ليه؟
لاني ما اتكلم بعلاج سحري يحول الشعر بشكل جذري اللي احاول افيدكم به هو الوصول لتصالح تام مع شعركم وتقبلكم له أيان كان شكله . 

الشعر بالتفصيل :

الشعر الدهني :
يفرز كميه زيوت كبيره وغالبا تكون خصله متلاصقه ومظهره كأنه رطب . غالبا يكون فيه قابليه عاليه للشقشره والشعر يجذب الغبار والاتربه -يتوصخ بسرعه . مشكلته هي الدهون الزايده .

الشعر العادي:
يعتبر حيوي ولكن يحتاج عنايه وحمامات زيت  ، ويعتبر مثالي والاقل تعرض لتقصف وسهل التعامل معاه .


الشعر الجاف:
قليل الدهون ليس فيه زيوت طبيعيه الشعره تكون جافه وباهته لقلة إنتاج الدهون وسهلة التكسر والتقصف ويحتاج لعنايه كبيييره

الشعر المختلط: -بين الدهني والجاف-
تكون الجذور دهنيه والاطراف جافه جداً - العنايه فيه تحتاج مزاج و وقت . 

طريقة العنايه بالشعر حسب نوعه :
 واضح من النوع كيف بتكون العنايه لكن بحاول أذكر لكم بعض الطرق الي إكتشفت إنو قليل بنات يعرفونها اصلا .
دهون الشعر وزيوته مو مضره بالشعر أبدا العكس هي أفيد شي له لانها مصنوعه خصيصا له ومناسبه له سبحان الله أنا ما آقصد لاتتروشون إلا بالسنه مره لا لكن إعرفوا الاوقات المناسبه لغسل الشعر بحيث ماتضره وتحافظ على نظافته .

الشعر الدهني :

واضح من الاسم إنه مليان دهون مايحتاج حمامات زيت وخلطات؟ إلا يحتاج لكن بطريقة مختلفه عن غيره يعني لما تسوي ماسك منزلي لشعرك وفيها بيض إستبدليها بعصير ليمونه 
لما تبغين تسوين حمام زيت حطيه على الاطراف ووقت قصير بس عشان يعطيه حيويه زيادة 
مع أنو نوع الشعر ماحيتاج عنايه بالكريمات والزيوت إحرصي على الاكل الجيد ولاتعرضينه للهواء كثير 
والاستحمام لا يكون يومي لان هذا بيضره ويعدمه افضل مرتين إسبوعيا أو ثلاث ، أعتقد بتحسون أنها مبالغه المفروض بشكل يومي ، لكن هذا خطا شائع غسلك لشعر بشكل يومي ماراح يقلل الدهون العكس راح يزيدها ، الشامبو إحرصي إنه يحتوي علي :
١- أحماض أمينيه
٢- خل أو عصير ليمون
٣-عوامل التنظيف الطبيعيه .
استخدامك لشامبو مستحضرات عنايه مناسبه لشعر الدهني راح يقلل الدهون دائما إنتبهي للمنتج وكميه الدهون فيه وإختاري شركه طبيه تناسبك أفضل لك .

كيف نحافظ على الشعر من الدهون ؟
عدم إستخدام المجفف بشكل يومي وتعريضه للحراره أو الهواء لانه يزيد الدهون. والتمشيط المتكرر و واللمس وأيضا إستخدام البلسم للعنايه ، لو إحتجتي مثلا لـ بلسم إكتفي به على أطراف الشعر الجدور لا تحطين عليها أبداً
خل التفاح ممتاز جدا لتنظيف الشعر من الدهون والقشره ويستخدم بعد غسل الشعر من الشامبو - أخر شي بالغسل 
الكميه (ملعقه خل تفاح+اربع أكواب مويه) بالنسبه لي هذا أفضل حل ولا تخافي من خل التفاح-الطبيعي- ماراح يجفف الشعر ابداً العكس يعطي نعومه وحيويه .
يمكن إستبدال الخل بالليمون ويكون (عصير ليمونه+أربع اكواب مويه) وإستخدام الماء الدافي أو المعتدل أفضل من الحار الجالب لدهون . الماسك لو حابه إستخدمي مرتين بالشهر لمدة ١٥ دقيقه وإحرصي على غسله جيداً .

-الاشخاص اللي يشتغلون بمكان فيه غبار وأتربه يحتاجون غسيل لشعر بشكل يومي-


ومن أسباب زيادة الدهون :
١- اللعب بالشعر ولمسه
٢- التمشيط المتكرر
٣-الوراثه
٤-الحراره والرطوبه
٥-الضغوط
٦-نظام التغذيه السيئ 
٧-التغيرات الهرمونيه والغدة الدرقيه
٨-بعض الادويه الكميائيه التي تؤثر على الهرمونات

الشعر العادي :

الشعر هذا مايتعب لكن ما يصلح نهمله لان إحتمال الاهمال راح يحوله لدهني أو جاف فالافضل الاتزان باستخدام المستحضرات وغسل الشعر مايكون يومي أيضا الاكل الجيد وتقليل التجفيف وتعريض الشعر للحراره .

الشعر الجاف:

من الاسم توضح لنا المشكله كونه جاف فهذا يعني أنه باهت وعرضه لتقصف ومتشابك وصعب التمشيط وصعب تسريحه
فحله يكون بحمامات الزيت والكريمات والبلسم الافضل انو تبتعد عن الفروه حوالي ٢سم بذات إذا ترطبي شعرك بأكثر من مستحضر . إستخدمي زيوت بشكل إسبوعي وأيضا خل التفاح مناسب لجميع انواع الشعر لكن تستخدمينه بشكل اقل من الدهني .
لما تشتري مستحضرات للعنايه بالشعر الجاف إحرصي تاخذين شامبو لتنظيف العميق-حتى لو شعرك جاف راح يحتاج هذا الشامبو وإستخدامه كل إسبوعين أو بالاسبوع مره .
والشعر الجاف بما انه صعب التسريح فبعطيكم حل خرافي له . هو لما تكونين مخططه تسوي سراميك أو فير لا تستخدمي بلسم قبل لانه بيحوسك وبعد لا تستشوريه قبل مباشره إبدي وإحرصي إنه يكون جاف بشكل كامل

والخطه الخرافيه الثانيه لما تستخدمين شامبو وتحسين شعرك للحين مافي حيويه إفتحي الشامبو وأضيفي له ملعقتين زيت زيتون وكل مابغيتي تستخدمينه رجي العلبه كويس وراح تلااحظين ترطيب شعرك وحيويته .

كيف نحافظ على الشعر من الجفاف؟
قص الاطراف بشكل شهري إستخدام الشامبو وبعده بلسم مو شامبو+بلسم ويترك البلسم لمده ٣-٥ دقائق على الشعر .الشامبوهات اي تحتوي على كحول وأيونات الهيدروجين إبتعدي عنها . أنصحك إستخدمي شامبو عضوي لان شعرك حساس لاي مواد كميائيه وراح تتعبه فهذا افضل حل ، المستحضرات اللي فيها زيوت كثيره إبعدي عنها يكفي تستخدمين شامبو وبلسم لشعر الجاف وحمام زيت مرتين أسبوعيا وزيت مره بالاسبوع ، طبعا لما تبغين تسوينه بالفير والسراميك لاتنسين تحطي منتج للحمايه من الحراره وسيرون لاطراف الشعر . إحرصي لما تدهنين شعرك تمسجينه لتنشيط الدوره الدمويه لكن مساج بطرف الاصبع مو الاضافر ، وإستخدمي شامبو ضد القشره مرتين بالشهر أو متى إحتجتيه . أنصحك خذي مكملات غذائيه تحتوي فيتامين ب و هـ عشان تعطيك ليونه وقوه لشعر هنا تدوينتي عن فيتامينات ماكسي هير:

تجربتي لـ فيتامين ماكسي هير بلس Maxi-Hair Plus للبشرة والاظافر والشعر

أسباب جفاف الشعر:
-الصبغات
-التعريض لحراره الشمس أو الاجهزة
-البيئه الجافه
-الكلور
-إستخدام مستحضرات غير مناسبه لشعر
-حبوب منع الحمل
-المعادن الزايدة في الماء
-سوء التغذيه
-الافراط بإستخدام مستحضرات العنايه
- الفرد المتكرر والمواد الكميائيه

الشعر المختلط ـ بين الجاف والدهني-

هو يكون جذوره دهنيه وأطرافه جافه وتعبانه هالنوع هذا قلت لكم يحتاج روقان مرره لانك راح تستخدمين طرق العنايه بالشعر الدهني لفروتك إلي ٢ سم والباقي طرق العنايه بالشعر الجاف .

نوعية الشعرة وعلاقتها بالعنايه بالشعر؟

نوعيه الشعره شي مهم جداً لانها إذا كانت خفيفه نحتاج نغذيها بزيوت وأكلات تخليها ثقيله  أحس نوعيه الشعرة تتأثر بالتغذيه بشكل مباشر كون أكلك مناسب وممتاز لشعر راح تقوى شعرتك والعكس صحيح

أخر شي نورينا بتعلمكم طريقتها السريه لغسل الشعر طبعاً هي معروفه شوي لكن بقولها لكم 

هي لما تجين تغسلين شعرك لا تحطين الشامبو مباشره على الفروه لانه إحتمال معطر إحتمال مايوصل لكل الاجزاء بتطرين تاخذي كميه جديه وتحطين والنتيجه مو بس أطراف شعرك تعبانه لا كل شعرك منهك وجذوره تشتكي الشامبو .
جيبي زبديه وفيها حوالي ٣-٤ اكواب مويه وإخلطي معاها الشامبو بعدين حطي على شعرك بشكل متدرج وسوي له مساج عشان يوصل كل الاجزاء .


علموني أيش نوع شعركم؟ إيش تتوقعون نوع شعري؟ وإذا عندكم حلول شاركوني فيها ق١